本帖最後由 楓花雪瑜 於 26/5/2011 02:22 AM 編輯
有睇過閒聊區我果兩個Post既村友,可能都見過我提及過蝴蝶同我之間既事...但就冇直接交代,
呢個Post除左記念果兩隻不幸犧牲既鐵甲蟲之外,仲會講返...我同蝴蝶既情緣...
先介紹下呢隻毛蟲,雖然佢同我地PM世界既綠毛蟲好相似,
但現實同PM世界始終有佢地既分別...
PM世界叫綠毛蟲>鐵甲蟲>巴他蝶
但現實就叫藍鳳蝶 Papilio proteno 為左等大家冇咁亂,所以我先一直叫返佢PM既名稱
呢粒係蝴蝶卵,當毛蟲就出世時,顏色會轉成深色...
PM世界,綠毛蟲係最初階段,但現實最初階段既反而係...
↑呢隻...圖中既就黎變綠毛蟲,所以先咁大條
↑呢隻係新鮮出爐既毛蟲仔,圖中係我手指尾頭...可見有幾細條
跟住先會進化成我地熟識既綠毛蟲
圖中佢終於伸出紅色既觸鬚,真係幾似綠毛蟲嫁...
當有一日 你發現綠毛蟲 縮成一個三角型,咁第二日 佢就應該變成圖中既鐵甲蟲
最後,大家都睇唔到脫皮一刻既成蟲樣...
似唔似巴他蝶就見人見會,始終現實大部份蝴蝶都係黑色為主...
如果現實太多白色 就似蛾多!?
但卡通太多黑色 又好似太邪惡?
嗯,介紹完畢,係時間講我暫時有生之年同呢種蝴蝶既情緣
我記得第一次見呢種毛蟲果陣,係我7歲果年,
果陣既季節同而家差唔多,係農歷新年之後,屋企棵桔樹未掉,咁就擺係窗口,
有一日 我溫緊書果陣,見到窗口有條綠色物體係桔樹到郁...
好奇心既我就走埋去睇...原來,係一條毛蟲(上圖既綠色果種)
咁我細細個就好鍾意昆蟲,當然想捉佢...由於我手唔夠長,所以諗住拉住樹枝,等個距離縮短
點知突然"扇"手...毛蟲就好似丫叉上既子彈,就咁飛左落街!!!
呢次係我第一次接觸綠毛蟲,亦係第一次累死左隻毛蟲...(當然可能唔係跌落街死...但都係我間接害)
同年,我既一次好奇,亦種下一棵柚樹,直到而家我23歲,棵樹都仲係我身邊...
而呢棵柚樹,同我 & 蝴蝶 有不凡既三角感情...
↑圖中係我種既柚樹,當然,呢度只係冰山一角既樹枝...(上圖除左蝴蝶成蟲唔係我影之外,其他有樹既相,都係我柚樹到影)
大約我8歲半果年,要搬屋...搬左去一個背山既屋村到住...
座山同墳場好近,所以好多爬蟲...當然,亦發生過唔少既靈異事件
大約10歲果年,有一次爸爸帶我去某水塘玩,
沿路景色好幽美,綠樹花香...一路行一路行...
突然,我既視線唔係望住呢D咁靚既風景...而係路邊一隻訓係地既蝴蝶...
正常訓係地既蝴蝶,大家都覺得係死左吧!?我都唔例外...
但都想去睇下佢死左未,至少,係佢死後,都有人欣賞佢既美吧
我彎低身望,咦!?佢仲拍緊對翼,手腳仲郁緊...未死Wo!
我即刻小心翼翼咁將佢拎上手,然後觀察佢...過左一陣,佢終於可以係我手度爬,
但都係唔識飛...我嘗試伸直手掌,輕輕力咁上下揮手,睇下佢可唔可以飛,
但佢都係飛唔到...不過佢有嘗試拍翼...
直到一陣風突然吹過......佢終於飛起了...
不過佢飛時,仲係有缺乏...我諗佢其中一邊既翼應該受左傷,
佢飛果陣係會上下上下咁...而且其中一邊係斜身,但當你以為佢會跌果刻,佢應該又用力咁向返上飛...
明顯同其他蝴蝶飛果陣唔同...
望左大約一兩分鐘,佢都係冇跌...可能我果陣都冇乜耐性...
咁...我就同佢告別,繼續望前行...
過左陣,我爸爸突然叫我,嗌我望後邊...
當我向後望果刻...我諗我呢世都唔會忘記果刻既場面....
係我身後面,竟然有一群蝴蝶...呢到冇十隻蝴蝶 最少有七八隻,
而且其中一隻 肯定係頭先果隻...我停左冇再行,望住佢地...
佢地亦係我身邊飛...不過好快,佢地就飛走左了......
呢次係我人生之年,同蝴蝶最親近,甚至親密既一次.......可能有人會覺得好不可思議,
但呢個係事實,我諗當年在場既人,都會記得...
直到唔知幾時,我棵柚樹亦長大了,
有一日,發現樹上有毛蟲...不過唔係我當年所見既綠色(其實係一樣,只係當年果條綠毛蟲係長大左,而我而家果d,係幼年,即係第一階段果種)
當然...我亦唔會放過捉佢既機會...奈何童年唔識養...d毛蟲都係死左...
un...直到10歲果年,係一個圖鑑上知道,原來我柚樹既毛蟲,會進化做我以前桔樹果種毛蟲...
我好開心...當我諗返水塘果次既奇遇...
我就同自己立定誓言,只要係我有能力既情況下,
我會保護呢種蝴蝶...養育佢地既幼蟲...
由呢一日開始,我冇再捉佢地,比佢地係我棵柚樹到自由走,自由食...
就算食到我棵樹光頭,我都冇怨言...
同年,1998...pokemon登陸香港,而其中一隻小精靈...
竟然同我窗口既毛蟲一樣樣... - 綠毛蟲
不過...咁多年,從來只有蝴蝶黎產卵,就冇蝴蝶蛹係我棵樹出現...
有一日,比我發現,原來我母親將毛蟲彈走哂...
佢話毛蟲會食哂我棵樹既葉...我當然極力反抗,但童年都係嗌唔羸佢
由果日開始,我個心都一直有個內疚感...
我不斷問自己「我失約了嗎?」
十幾年,一個蛹都未見過...你話幾失敗...
當我越黎越大,想彌補既心亦越重...我開始用知識黎反論返我母親...
巧合果一日,我爸爸都係到...佢見到條綠毛蟲都好大,
佢企我果邊話:都就黎變蛹,比佢留係到啦...
嗯,我深信,我爸爸記得童年果一幕場景
不過第二日...條毛蟲都係唔見左!!!
我當然搵我母親尋仇...但我母親話冇郁過佢...可能係佢食葉果陣,食左塊葉既接口位,
就係咁...跌左落街...
不過,我反而覺得係比麻雀食左,因為我住平台上一層,朝早d麻雀都係到吱吱叫...
一直都唔知點算,唔通要我24小時守住棵樹?根本冇可能...
但有一年,我係窗口意外搵到個蛹殼...不過就係空既
上年,我開始日日係自己樓下總站度搭巴士...
由於總站,等巴士黎到,都要比司機休息一陣,我就周圍望下d樹...
唯獨有一棵樹,我好驚喜...佢應該係桔樹,我見有幾粒桔係樹上(上年秋天左右)
當然...可能係有人掉桔落街?咁岩落中棵樹!?(因為粒桔好高下)
anyway,我又同自己約定,下年春天(今年既3月...)記得証實下
今個月頭,我終於記得呢件事...果日我不停提自己...
終於到搭車果刻,我去望下棵樹...果然有好多毛蟲!!!
同我窗口柚樹果d一樣...嗯,睇黎我約定既日子終於成功...
我帶左4條毛蟲返屋企,由於桔樹好大棵...3米左右...所以我每日都會摘葉比佢地食,
當然,摘果刻,我會對棵樹感恩...
後黎有兩條蟲比左我朋友養,而我養果兩條,
就係大家睇我post既其中一條...
亦如大家所知...最後,我都係失敗...已經好好養育,點知都係避唔過寄生蜂既攻擊...
仲記得果兩條毛蟲變蛹果刻,我好開心...
開心到...返game生蛋...生指定性格 個體既綠毛蟲黎記念呢一日
(2010年1月,我心愛既雨林死左 我都有生左巨鋏天蠍記念佢)
最後都生左隻唔錯,特攻同速有30~31 其他2x...
估唔到最後果兩個蛹都係死左...說好的蝴蝶呢!?就變左game入邊既巴他蝶
望住呢張相...真係哭笑不得...(再一次多謝NHC0911既圖)
佢地肉體死左,但靈魂生存係我部nds度?甚至我心入邊?
可能有人會笑我,竟然會為左條毛蟲咁大感觸
但係我心中,任何事物既價值都係一樣
有感情既,就算一隻蟻,我都會為佢喊
冇感情既,就算係血緣關係既人,佢死左我都唔會喊...
呢兩條毛蟲,雖然我照顧既日子唔算多,
但自問真係好比心機去養佢地...
仲記得有一晚,佢地無拉拉好快咁食哂d葉,為左怕佢地餓...
我半夜三更 落去棵樹搵葉,果刻都幾恐怖...完全冇人...仲要係山上邊
嗚嗚聲...
你唔驚墳場既朋友,都膽心有賊啦...
不過,有生之年 我還是不會放棄呢個約定...
最後,多謝大家一直既支持同鼓勵
而家手頭上,只剩兩條毛蟲,希望能夠成功變蝴蝶吧?
今年唔得,下年?或者會得 |
發表於 22/4/2011 12:12 PM 
收藏
分享
撐
踩
提升卡
變色卡
千斤頂
發表於 22/4/2011 01:06 PM 
樓主
發表於 23/4/2011 02:12 AM