相愛拍拖守則

小卡

--------------------------------------------------------------------------------
唔該俾多Ｄ時間溝通，因為你唔識心靈感應架
＞有時，女仔會好想同男仔傾偈，但總係覺得男仔唔明佢。其實要明白百一個人係好難既事來。會有佢唔想同你講野既時候，會有你唔想同佢講野既時候。所以當你地一齊想講野既時候，就好好珍惜。我講既溝通唔係去邊度食飯，去邊度睇戲，買邊件衫，邊個明星Ｄ歌唱得好呢Ｄ咁無深度既事。我講既溝通係你地對你地既關係，對方既問題，自己既問題等等可以影響你地關係既事。講野時要坦誠。一定唔可以驚佢唔開心而唔講。對方夠成熟，愛你，聽時可能會唔開心，但之後會明白。相反你都要做得到，對方講野時唔好先諗住駁，因為有時只要你一駁，對方就會唔想講，會覺得講來都無用。聽多Ｄ，講多Ｄ，改善自己，唔單止係為左段感情，最重要仲係為左你自己。有個情人俾你可以深入Ｄ去了解人同人之間既問題，唔好浪費，唔通你同你叫出去玩既人講埋你同人相處既心得咩？更何況你都唔想個男仔唔顧你令你唔想佢唔開心時自己要晚晚喊啦。愛係兩個人既事來，係人都知，但又明幾多呢？有個肯講自己有乜唔好既男女朋友係好難得架。


男女係有唔同既，唔係剩個胸同下面既分別
＞男會中意玩，但會比女孩更早定性；女仔唔想男仔顧住玩，但多數都會玩到見到人地都唔想玩先至識驚，所以會比男仔玩得更耐。呢個只係男女既不同之一。男女不同仲有好多。但唔該你地明白，男女係有唔同架。互相遷就，唔好成日要求個男既完全乎合你既要求，如果係要咁既話，不如飛左佢，因為個世界七十億人，總會有個完全乎合你既要求。要知道，如果對方為你改到完全乎合你既要求，但係佢已經唔係佢，咁你愛既人就已經唔見左。當然我咁講係有Ｄ誇張，但係只係想大家知道一樣野，有限度接受佢，有限度改變佢，你唔會咁勞氣，佢唔會咁大壓力，佢想改既，少少、慢慢來都會改俾你睇，佢唔想改，你講到啞佢都唔會改。一係接受，一係俾Ｄ耐性（唔係話一年有耐就性，耐性係要受到不斷既挑戰先知底線。），無必要搞到自己見到佢就嬲啦。

俾多Ｄ耐性
＞上一點最後講過一樣野叫耐性。呢度我想講既都係面對小事時既耐性，因為如果真係大事，女人通常都會好有耐性。點解小事上要有多Ｄ耐性呢？因為有時男性比女性無耐性既情度差好多，但更多女性比男性無耐性！點解拍拖要有耐性呢？因為兩個人之間有好多野要等。等佢放低之前既人，等佢改，等佢更愛你，等佢對你更坦白，等佢學識去等你！全部都要時間。要有耐性，首先要識得有一個諗法，就係同佢既日子仲有好多，點解要急於一時呢？無耐性既人好容易令人感到壓力。男性好多時都會有Ｄ野中意拖字訣，如果你無耐性，點同佢作長期抗戰呢？仲有，有耐性都係一種美德，有耐性，你就自然識得忍耐。小小事都唔忍得，無耐性，你對男仔既吸引力就會就無咁大，因為你會忍唔住對佢太好！你無耐性，都會好容易傷到自己，因為當激情過後，你會好易忍唔住長久既平凡。同時唔好睇到呢度唔記得我一路講既都係小事，如果你連小事都無耐性，遲早兼極有可能男朋友俾你煩死，你就俾個男朋友激死（最重要係呢樣）！

表裡不一有限度，人地個心無透視眼架
＞女仔中意口不對心。有時佢講錯野時，總會講：「我個口就係咁講，但我個心唔係咁諗架。」人同人相處，做出來既事就會成為人地對你性格既印象。表裡不一，掌握得好會令人覺得你神秘，增加你既吸引力，令你既男朋友多少會為你神魂顛倒（佢地可能會有多Ｄ興趣去發掘你既本質，不斷從你身上找尋驚喜），但係如果你掌握得唔好，又或者你本來係個咁既人，你就會令人無所適從，覺得你好假，男方會為左知道你本來既性格疲於奔命，特別係你故意咁做。表裡不一係好，但要有個限度，小心你自己表裡不一既程度，唔好到時話對方無了解你。可能佢有好努力咁了解你，都知你有時表裡不一，但係佢根本唔可能知你表裡不一又自相矛盾時真正既想法。除非佢係你，但係無可能架嘛！咁樣搞法，就算平時溝通得好好都會俾你玩死。

每個人都可能有個忘記唔到既人
＞你可能唔係佢最愛既一個，佢都可能唔係你最愛既一個，如果係既話，呢樣野大家無論拍拖幾耐都好，都一定要接受，特別係你愛佢，唔係你只會傷心死你自己。如果你最愛唔係佢，你唔講佢唔知，不過當然如果佢問到，唔好講大話，唔好講無。呢樣野一定要老實。不過就唔好唔該唔好成日題，因為男人好怕俾人地搵佢來同人比，你可以話對方點唔好，不過唔好人比人。有個女仔，佢成日同佢男朋友講佢最愛係邊個，有次同佢男朋友咀完既時候，同佢男朋友講佢最愛既Ａ君咀得技巧好Ｄ。令到個男仔之後每次聽到佢女朋友講最愛係佢既時候都覺得佢講緊大話，每次聽到講最愛佢既時候一Ｄ都唔會開心，只有傷心，但係個女仔可能講真。有Ｄ野收得好Ｄ，大家都開心Ｄ。唔好話佢都做唔到呀，我只係叫你做好自己，好多時候係唔可以咁計較。

唔該要識得珍惜

＞到最重要既一樣。好多女仔同男仔都一樣，係唔識得珍惜。不過女仔仲有一樣係唔記得，就係珍惜自己。女仔唔好為左個男仔就乜都肯，而家既社會觀念好開放，明明有好多野係唔應該既都會因為見怪不怪，再加上好多其他人既不負責任言詞變得混淆不清。講既唔負責任，聽既又會覺得無所謂，男仔愛你未必同你講介意，所以唔好俾任何愛你既人個心有刺，唔好以為愛你就會唔介意，做Ｄ唔珍惜自己既事出來，有時佢地不過係包容（有時要知道有Ｄ野接唔接受到唔係愛唔愛既問題，係原則既問題）。所以女仔一定要珍惜自己，唔好俾而家既社會觀念輕易影響。

＞好，講完珍惜自己。到講珍惜對方。好多時，男仔係會更珍惜女仔，不過女仔會將自己唔開心既講出來，所以男性對女性唔住既事先會傳得快Ｄ同多Ｄ。呢個現象絕大多數人係唔覺，佢地只會當正男仔愛情上係會差Ｄ，所以女仔會受傷多Ｄ。就我所見，男同女其實差唔多，但可能更多係男仔會更多俾女仔傷左，唔出聲。唔通俾人傷仲要周圍俾個傷口人地睇咩？女仔多數都係中意玩，但係玩得來個心又會唔定，而女仔又會因為中意玩，好容易會對一段長久而無乜變化既關係覺得悶（當然男性都會，但女性會係多Ｄ）。

＞好多女性都怕悶，特別係年輕既，會好想玩，當覺得一段感情變左習慣，變得平凡既時候，就會因為缺少左刺激，慢慢唔記得左段愛情。呢個時候就會變得唔想再同個男朋友一齊，而身邊既玩得又講得既男仔呢個時候就會令女性有一種久遺左既開心感覺。你地未必會中意呢個男仔，但呢個男仔就係會有種提醒你：拍拖開始拍得有Ｄ悶既感覺（睇到呢度既你無，就當然最好）。你要分得清淡同悶係唔同架，唔好因為平凡（平凡係好難得架），唔好因為有個同你夾Ｄ既男仔出現，就輕易分手。有時唔夾（唔係唔夾到好離譜又唔肯改那種），你地就應該諗：我要多謝佢俾個機會我可以過兩種人生。你同佢一齊既時候，你會慢慢了解佢，會慢慢不自禁咁投入佢既生活，道理正是如此。

＞有時見到Ｄ拍左七八年拖既分手，係因為習慣左既時候，真係覺得佢地好可惜。你地其實可以試想像你地當初既熱愛係一樣感覺物件。愛係會隨住時間慢慢消失，但係會有一種叫感情既野出現。當無左愛情，你地就應要對當初既愛有感情，即係對你地會對當初你地之間既愛情呢樣感覺物件會有感情（如果你地唔係為愛而愛），就係對你地之間既愛情呢樣感覺有感情，人先可以做夫妻，先可以長長久久，你估愛情真係可以一世都咁激烈咩。而你地如果唔珍惜你既男朋友，就會有機會制造因為你地而唔識珍其他女仔既人出來，會令到其他女性好慘，所以為你地自己，為左個男仔，為其他女性，學會珍惜，唔好到人地離開，到自己錐心刺骨時先知道珍惜係好重要。好多人都係俾人傷得好深先識做，好悲哀。

＞同男仔一樣，俾你地諗樣野：如果你知道你聽日會失去你身邊既男朋友，如果你知道你男朋友聽日會死（唔係咒佢），諗起你以後行街隻手會少左個地方唔知點擺，平時一齊行既路以後只得你一個，喊既時候無左個膊頭同佢既懷抱，拎起個電話明知打出去都唔會再有人聽，發覺應該乜都搵到既ｉｎｔｅｒｎｅｔ原來係搵佢唔到，你留底俾佢既公仔以後無人照顧，你講野最開心既時候無人靜靜地咁仰望住你，發覺原來係好想佢煩住你同你嗌交，唔會再有人低頭到你耳邊同你講你今日好香，唔會再有人唔怕你剛睡醒口臭照錫你，發覺原來好想聽到佢講野可以俾你靜靜地睇真Ｄ佢，想記真Ｄ佢個樣既時候發覺原來你平時根本無真真正正好專心咁去剩係望佢既眼，耳，口鼻，仲會唔會咁易發脾氣激到佢走？掉轉頭唔想見到佢？到時你就會寧可時間永遠停住今日，俾你好好睇真Ｄ佢架喇。


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~


各位，珍惜好難學，但係都希望你地可以學到，唔好到時失去，先發覺原來個心真係會痛，唔係話心痛咁簡單呀。由痛來學珍惜，真係會痛得好緊要。
我講既唔係你做左就唔會散，因為相愛係兩個人既事，你地做好你自己，就算散左，傷心之中唔會咁易因為後悔而令你地更傷心。

--------------------------------------
轉自:UWANTS論壇

Nido

太麻煩了吧?-.-

路人2號

口語化了一點耶..........