本帖最後由 elvis 於 10/9/2015 08:38 PM 編輯
早陣子想轉一下寫短篇口語文。然後就拿了2014年愚人節Google Map的背景做題材，原因是想顯得用口語更加合理。
第一個系列是去年發布在某論壇某私人區裡。後來換論壇後就索性重寫，但也是半途而廢了。
今天公布了Pokemon GO。PGO 宣傳片比起愚人節那段更加貼近我當時想的概念…幾乎正正是我所想的東西。於是感覺我的想法都不「新鮮」了，所以我也沒有打算再寫下去－－至少我一定不會接住現有的故事寫下去。無論如何就借此機會貼上來吧。
以下是早期版。重寫版會貼在下一層。
標題未定
經過早排愚人節Google Map x Pokemon單野之後忽發奇想，
不如就寫篇現實 x Pokemon故。
閱前注意：
1. 本文只用廣東話書寫。
1. 本文只用廣東話書寫。
1. 本文只用廣東話書寫。
1.1. 因為很重要所以要寫三次。
2. 本故事純屬虛構，與任何實際存在的人物、團體、國家並無關係。
3. 本文含有中二要素。
4. (可能)有粗口filter。好孩子不要問原本的字是甚麼。
5. 冇甜。
1.
是咁的，話說2014年3月31號晚，Google Map出左隻捉pokemon嘅game。條trailer都做到幾鬼認真，又爬山又行沙漠又出海，好似真係好盛大嘅咁。不過實際上都只係響手機版map度周圍搵pokemon，唔駛出街周圍搵。
但如果真係好似Google自家出品隻"Ingress"嘅話，成件事又唔同晒。話唔定我仲即刻就脫左毒。
而事實就係果晚我用左幾粒鐘去玩隻game，變得仲毒左…雖然本來都毒。
明明第二朝仲要過去機場送機，結果都玩到三點先訓。
(待續)
2.
朝早九點幾到左機場。
事緣阿爸阿媽走去旅行，而我就唔知點解都跟埋去幫手拖行李…
愚人節就應該愚下自己，好似係。
點解我唔去？仲有學返囉。遲慣到嘅我走成個禮拜堂會唔夠attendance。
到十二點幾送完機返歸，返去又要做final year project。
到我行到去巴士站等車，先拎起部手機開返個Google Map出黎繼續搵。
手機自動定位左去機場，而響機場跑道果邊就有隻音符鳥。
我好自然咁拎轉身望去後面嘅跑道。又一架飛機起飛。
我究竟期待啲咩？唔通真係會有pokemon咩？
…再講呢個角度根本唔岩，又咁遠，有都睇唔到啦。
呢個時候巴士黎到，我亦頭也不回咁排隊上車。
響我就黎上車果陣，我眼角好似稍到啲乜野，好似係藍、黃、綠色咁嘅。
我心諗一定係尋晚唔夠訓，幻覺黎姐，嚇我唔到嘅。
我一望過去，又真係有隻音符鳥響度。
(待續)
3.
如果問我動漫世界入面有咩作品最適合融合去現實，我會二話不說答你數碼暴龍。
數碼暴龍出左咁多代動畫，每代嘅數碼世界都係屬於一個異世界，而主角就會帶住拍檔響現實或者現實世界探險。
就好似第三輯馴獸師之王，呢個世界嘅數碼暴龍本身就係虛擬角色，後尾就變成真實存在。
所以如果數碼暴龍化為真實，應該會比較貼近第三輯嘅世界觀。
就算我鍾意嘅無容置疑係pokemon，都同乜野異世界探險扯唔上關係。
而當我見到眼前有隻pokemon出現嘅時候，我真係覺得好大違和感。如果前面係隻基爾獸個感覺應該冇咁強烈。
而下一秒，我就諗係咪依家科技勁左咁多，立體投影已經咁勁。但橫眼掂睇隻音符鳥都係實體先。
如果唔係立體投影，咁應該係pokemon center空運到港嘅毛公仔，但以毛公仔黎講還原度就有啲高到過份。
值得慶幸嘅係，隻野絕對唔係啲咩寫實版pokemon描繪下果啲好恐怖好奇怪嘅樣，而係同3D模組一模一樣咁濟。
就係咁先不可思議。真嘅唔似真，假嘅唔似假。
響我望到隻野幾秒間，已經有個男人行埋過去個花叢度睇佢咩黎。隻野見到就即刻向我飛埋黎。
(待續)
4.
我即刻踎低避開隻野。
同一時間為免阻到後面啲人我都拿拿聲離開條隊。
由我見到隻野到佢飛埋黎都係幾秒鐘，我都冇咩時間去搞清楚眼前嘅事。但我知我唔會當乜都睇唔到就咁上車。
後面有啲人都好奇緊咩事，不過有位阿叔都係講左句：「依家啲玩具咁高科技？」然後就上左車。
再點講唔係個個都熟悉pokemon。對一啲人黎講都只係停留響151隻pokemon果個年代。
「呢舊野你架？」頭先靠埋去音符鳥果個三十幾歲嘅男人問我。
「呢舊」。睇黎佢都當佢係玩具之類。
「唔係…但…」
隻野響我頭頂盤旋。
「佢好似跟實你？」
做咩事姐？家陣我係被選中嘅細路咩？係就應該早10年我仲係10歲果陣就好喇。
因為我玩緊Google Map隻game？
車站咁多人都無理由剩係揀我掛？除非真係得我一個玩緊…
「3DS…3DS…」隻音符鳥係咁叫。
我差啲就想講：「pokemon識講野！？」但呢隻野識講野真係完全唔出奇…
雖然唔知咩事，我拎左我部3DS出黎。右上角粒綠燈著左，代表有擦身通訊。
講真我都只係諗住刷下步數，開通訊都只係順便。
一打開，部3DS彈左個通知。日版機都係寫日文，大概話咩下載左新apps，仲有個禮物icon。
明明我都冇開wifi。
個apps標題係"Pokemon Challenge"，同呢個愚人節計劃個標題一樣。
「搞咩事呀…」
我打開個apps，今次就係堆command line彈左出黎，差啲以為中左病毒。後尾都出返睇落正常少少嘅GUI介面。
而我之後見到嘅就係話同Pokemon X連動完成之類嘅message。
見到咁我就即刻拎返我部手機諗住上網搵資料，點知連我部手機都裝左啲奇怪程式。
咁唔科學喎喂，3DS我就當擦身通訊可以擦到自動下載，手機自動連線又咩一回事？有咁危險嘅通訊隨時可以發放病毒都得啦。
不過後尾又覺得冇咩咁出奇，連pokemon都變成現實咁仲有咩做唔到。
機械嘅野我唔明架喇。
總之我部3DS似乎認證左我係8個勝章嘅訓練員，然後同部手機同步左資料之後個apps就冇左。
手機方面就多左個幾個apps，包括一個圖鑑"Pokedex"。圖鑑預設畫面係Google Map登場果150隻，另外多左個選項叫National Pokédex，全國圖鑑。因為我X版爆左機關係？
另外有個apps係寫"Bag"。個設計好似遊戲入面咁將道具分晒類，但除左精靈球一欄有五個普通精靈球之外就乜都冇。
我撳左一下精靈球果粒制，佢彈左個選項叫「取出」。
取出？點拎呀？唔通真係會有個精靈球出現？我再撳。
一個精靈球響我手機mon上面出現，懸浮響半空。
機械嘅野我真係唔明。
(待續)
5.
「去啦精靈球！」…傻的嗎我邊可能咁嗌出黎。
我將個波拎到上手就即刻掟左去音符鳥度。反正我都冇任何精靈響手，唔會扣到佢體力，而且佢似乎都幾願意比我收服。
就係咁，我收服左第一隻精靈。
老實講如果比我揀我真係希望有咩利羊做我第一個夥伴，比卡超、小磁怪都可以，再唔係(種族值)600種嘅基礎呀、伊貝呀、最近人氣高企嘅Espurr呀、XY發售初好受歡迎果隻格鬥鳥都無所謂…而唔係一隻慘到曾經因為一個招式而連官方比賽出場資格都冇、仲要冇左都對成個遊戲幾乎無影響嘅雀。
「寵物小精靈？」頭先遇到果個男人咁問。睇黎起碼佢都知精靈球。
「係掛。」
「『係掛』？但你好似好清楚喎…」
「我同你一樣都只係估呢隻野係pokemon姐。」
我心諗，我都唔知依家我對住嘅係咪真係叫pokemon，定係扮到好似pokemon嘅digimon。
雖然我大概都知依家pokemon走左入現實世界，但我所知嘅始終都好有限。就算係我知嘅都理解唔到。
再點講我相信岩岩我所見到嘅事情已經可以寫入人類世界重要歷史，姐係同工業年代開始、世界大戰爆發果種級別。
諗到呢度就覺得有種恐懼。
「咁你頭先做左啲咩黎？可唔可以教下我？」
「你有冇3DS丫？」
「3DS？咩黎架？」
「Sorry，我諗我教唔到你。」
當時我只係諗一定要3DS先得，但冷靜啲諗其實未必關事。頭先3DS只係同我做認證，如果唔認證應該只係唔開全國圖鑑或者其他隱藏功能。
但再點講我都唔想留響度太耐。我轉個身望，發覺周圍都有啲人望過黎，好似有啲人拎埋部手機出黎咁。話唔定頭先我捉精靈果幕都錄低埋。
一諗到比人影左樣放埋上YouTube呀Facebook呀就驚…
「失陪喇。」
雖然可能已成定局，但我諗再留響度都唔係辦法。
(待續)
6.
對於目前嘅狀況我應該點做？
一定唔係返屋企先。
諗到呢度，第一樣野就係去睇啲車可以去邊。於是我去左水牌果邊。
咁去邊好？
油麻地警署。我第一個諗嘅地方就呢度。
點解？緊係唔會走山長水遠去報警。要報我即刻去報啦。
話時話，點解我好似冇諗住報警？
一，今日係愚人節。
二，就算對方信，結果恐怕就係拎左我部手機同3DS去研究，我唔想。
三，家陣我連呢個遊戲…或者叫系統，都未搞清楚，滿足唔到我嘅好奇心。
四，I love Pokemon。
至少響比人捉去問話之前我會選擇自己一個研究下先。
講返正題，油麻地警署有啲咩？
鬼盆。
響隻mini game入面，以我所知香港有出現嘅精靈有幾隻：石澳鯊魚龍、太平山比超、機場音符鳥同油麻地警署鬼盆。
依家我捉到一隻，咁我都有理由相信其他已知地點都會見到。最近就一定係油麻地。
不過去到都要啲時間。
就算假設頭先我見到音符鳥果刻係全世界第一宗事件，我依家即刻搭車去油麻地都難保有人發現左。
響我唔知道有冇重生機制嘅狀態下，我諗搵人幫手去試會比較好。
「喂，你依家響邊？」
(待續) |
收藏
分享
撐
踩
提升卡
變色卡
千斤頂
樓主