香港寵物小精靈村落論壇

標題: BT禁左真係好!? [打印本頁]

作者: Ryan仔仔 時間: 18/1/2005 07:27 PM
標題: BT禁左真係好!?
如果冇BT,WinMX可能我屋企真係一隻碟都冇.......
因為我dl過某歌手既歌覺得好聽先買左........

以下轉自某網友

通常呢o的影嚮咁大既行動，一定有佢既好處與壞處，
禁 bt 與唔禁亦一樣，唔會百利而無一害，或者百害而無一利，
執法機關其實應該要考慮個好處與壞處，再而去制定一套更全面既方法去做事，
至於點樣更全面去做事，我唔係有關政府人員，我唔識提議。

其實，如果果位老兄被入罪，即係暗示左用 bt 係犯法既，咁對整個互聯網既影嚮係好大。

如果 bt 是犯法，咁我地 icq send 收 file 都有可能犯法。到時唔好話send 一套戲，簡單少少，send 一首歌或者send 一個入球片段、廣告 movie 甚至一個sound wav 都應該係犯法，我想唔出 send 收icq file 與 bt 有乜分別。

對用戶既影嚮，版權擁有者可能唔關心，唔緊要，因為同佢地利益沒有直接關係。不過，如果 bt 被禁，對電影業、唱片業、樂壇甚至電腦界來講，係唔係只有好既影嚮而冇壞影嚮呢﹖我就覺得未必o勒﹗

對於電影業來講，可能好處會較多，大佬，15蚊隻vcd、19蚊隻dvd，咁你仲download﹖咁對於電影業來講打擊係幾大。不過，某程度上，bt 既泛濫亦都反映左而家既電影有好多係唔值得睇，電影業亦應該檢討自己，不應該將所有責任推晒落 bt 身上。一年幾百套垃圾戲上，唔好話買 vcd，bt 都嫌佢浪費時間，仲想人入場睇﹖有質素既電影，根本唔怕冇人睇。幾時見過阿星爺o的戲冇人睇﹖《功夫》一出，幾多人買唔到飛﹖幾多人睇完一次想睇第二次﹖外國既大製作一樣，《蜘蛛俠》、《哈利波特》等等一上，都係個個爭位買飛睇既。真真正正票房差既，就係某一o的港產低質素既垃圾戲，根本就算冇bt 出現，呢o的戲都係冇人睇，所以，電影界係好應該籍今次事件去檢討，叫有關當局打擊老翻之餘，亦應該自我反省，有因必有果，點解o的戲會冇人睇﹖

其實對於唱片界同樂壇來講，bt 被禁係咪都係一面睹得好處冇壞處呢﹖我肯定唔係。其實下載泛濫，真真正正影嚮既，可能只係一o的七十六歌手，如果係有質素既歌手，佢地既唱片一樣唔憂冇人買。我自己雖然好少bt，但仍然會從不同途徑下載mp3，例如 winmx 或朋友的icq，但我仍然一樣支持正版，部份我喜愛既有實力歌手既碟我一樣會買。李克勤最近幾隻大碟、左麟右李演唱會等等我一樣有下載亦有買正版碟，克勤既《everlast》，我買左之後隻碟一次都冇放過落部機度聽，學友既《Life is like a dream》老鍊咁大個盒，我買左後亦只放過幾次落機聽，其餘時間我都係聽番下載落黎既mp3。張學友既《黑與白》，封面根本唔需要有佢個樣，一樣會大把人買，因為佢本身有實力，即使bt 如何盛行，佢一出碟o的人都係爭住去買，亦有大量固定既支持者。

同電影業一樣，唱片業見到 bt 同盜版盛行，亦好應該自我檢討。一年百九幾個新人，有實力既有幾多﹖可能五個唔夠。我地點樣可以從汒汒大海之中搵到呢三兩個有實力歌手出來﹖bt 與互聯網既下載，正正對呢o的有實力新人起左好大既宣傳作用。冇錯，大家可能覺得聽多o的電台就可以認識到佢地，但可惜，電台係唱片公司既影嚮下，播放率同歌手實力不成正比，單靠聽電台亦不是一個最直接宣傳有實力新人的途徑。

試諗下，一個新人三九唔識七，你會唔會一開波就花七十蚊買佢隻碟﹖佢冇人識隻碟冇人買o的歌冇人聽過，佢幾有實力都係假，最後就只會係汒汒大海之中與其餘百九幾個七十六新人一起被活埋。互聯網的出現，我地可以更有效去接觸到呢三數個有實力新歌手，例如朋友a 聽完佢覺得正，send 左首歌俾我，我聽完覺得正，就send 俾朋友 b，咁呢個新人就真真正正得到宣傳，亦係反映左歌手既受歡迎程度，當佢真正得到各方面肯定時，佢既碟會冇人買﹖

好多人將bt 及互聯網下載與盜版碟等同，其實呢個觀念並不正確。o的人買左盜版碟，因為佢付出左20蚊買老翻，之後就肯定不會再買正版，這個好肯定。但歌曲下載就唔同，因為係免費既原因，如果係正，o的人聽完都有可能會去買正版，我有時都會係其中一人。可能你會覺得我浪費金錢，dl 完仲買碟﹖但如果連一個新人既歌聽都未聽過就買碟，咁係咪更浪費金錢﹖樂壇最近口口聲聲話要打擊翻版同下載，但事實上佢地自己內部有冇檢討﹖新人係咪過份泛濫﹖新人既泛濫連舊人都影嚮埋，亦都係有因必有果既例子，點解要全部賴晒互聯網﹖如果係一o的垃圾歌手，即使冇互聯網的出現，碟，都係冇人買的。

再者，如果 bt 被禁，對於有關方法打擊翻版係咪有絕對好處﹖bt 的出現，連帶盜版行業都慢慢息微。以往一百蚊三隻，而家已經變到五十蚊十隻賤賣，因為盜版自 bt 的出現已經生意漸少。「野火燒不盡，春風吹又生」，如果有關方面係呢個時候將 bt 禁止，最開心既一定係盜版商﹗盜版商係乜人黎先﹖咪又係大部份黑社會﹖到時o的黑社會又多番一條賺錢途徑，到時又再成個信和星際甚至旺角街邊都變晒老翻集中地，而政府，是否有足夠既人手每天都出去掃﹖

bt 同盜版唔係話唔禁，但係禁之前，版權擁有者同政府方面是否應該盡快研究一整套配合方法，等o的人冇得買盜版亦可以心甘情願的去買正版﹖bt 被禁之後是否亦可以有力地打擊到市面既盜版﹖呢樣先係有關方面最應該做既事情。而家所做緊既一切，只不過係見步行步，有人投訴我就做少少野 tum 住你，但實際亦冇考慮係呢一個 moment 行動所帶來對社會既影嚮，各方面無論係版權持有者、歌手、演員、政府以至觀眾和聽眾都係全輸局面，得不嘗失

水能載舟、亦能覆舟
其實bt 係咪真係扼殺

作者: 莫邪 時間: 18/1/2005 07:41 PM
有點彎理
但把彎理說直
倒是相當利害

作者: Ryan仔仔 時間: 18/1/2005 07:50 PM

Originally posted by 莫邪 at 18-1-2005 07:41 PM:
有點彎理
但把彎理說直
倒是相當利害

請問你覺得哪裡是歪的??

作者: 莫邪 時間: 18/1/2005 07:52 PM

Originally posted by Ryan仔仔 at 18-1-2005 07:50 PM:

請問你覺得哪裡是歪的??

中間的一部分

作者: Stefan 時間: 18/1/2005 08:06 PM

Originally posted by Ryan仔仔 at 2005-1-18 19:27:

bt 同盜版唔係話唔禁，但係禁之前，版權擁有者同政府方面是否應該盡快研究一整套配合方法，等o的人冇得買盜版亦可以心甘情願的去買正版﹖bt 被禁之後是否亦可以有力地打擊到市面既盜版﹖呢樣先係有關方面最應該做既事情。而家所做緊既一切，只不過係見步行步，有人投訴我就做少少野 tum 住你，但實際亦冇考慮係呢一個 moment 行動所帶來對社會既影嚮，各方面無論係版權持有者、歌手、演員、政府以至觀眾和聽眾都係全輸局面，得不嘗失

最好的方法：減價XD

作者: SusanCrystal 時間: 18/1/2005 08:14 PM
冇BT = 唔去日本唔使睇

歡迎光臨香港寵物小精靈村落論壇 (https://proxy.archiver.hkpnve.pokebeacon.com/)

香港寵物小精靈村落 論壇

香港寵物小精靈村落論壇