香港寵物小精靈村落 論壇
標題:
666 魔鬼學位
[打印本頁]
作者:
MichaelKan
時間:
16/6/2006 01:02 PM
標題:
666 魔鬼學位
大家有冇留意你讀o個間學校裡面，梗有一間課室長期放住一個空置座位。每一個學期開始，同學都會自動避開坐呢個位，就算有同學破例坐o左，老師都會安排o個位同學坐去第二度。呢個座位之所以空置，唔係因為遠得滯聽唔到書，又或者係老師睇唔到，最大可能係呢個座位係「魔鬼學位」。
小意同陳舜可以話係由細鬥到大，兩個人由小學四年班開始就同班。小意自小已經係校內o既學界運動代表；而陳舜就中途發力，由四年級開始先加入校隊，但成績突飛猛進，不斷威脅住小意。所以兩人雖為同學，但實則互相視對方為死對頭，做咩o野事都互不相讓。
直到升中學，兩人都「有緣」地被派到同一間學校，甚至編同一班。同級學生係人都知佢o地乜都爭餐死，最經典o既莫過於中一o個年，兩人為o左認叻，決定o係最凍o個日鬥著得少衫，結果兩人o係只得３度o既極低氣溫下，只穿著薄薄o既校服裙上堂，結果兩個人都凍到面青口唇白，上堂聽書時係咁震，但就點都唔肯著衫。最後要勞動到校長出馬喝止，再加唔著校褸就要記大過，先至威逼到兩人肯同步著返衫。雖然兩人之間不分勝負，但「鬥衫事件」已令二人o向學校「聲名」鵲起。
轉眼間兩人都已經讀到中六，雖然唔會再好似以前咁鬥埋o的無聊事，不過明顯地兩人依然係死對頭。中六開學o個日，兩人又開始互窒對方。
「陳舜！乜你都升到中六咩？你會考到幾多個A呀？」小意問。
「三A四B囉！你咁巴閉考到九個A呀？」陳舜諗住自己會考成績咁好，一定叻過小意。
「我同你調轉，四A三B囉，係咁易多你一條A啦！你就恨唔到喇！」小意有心晒命，又激嬲o左陳舜，「好叻咩？真係咁叻就試o下坐o個個魔鬼學位！你敢坐又冇事我就話你叻！」
「魔鬼學位」其實係佢兩個就讀o個間中學o既一個傳說。話說以前有一個女學生，因為會考失敗而神經失常，o係開學日自己一個入中六課室「返學」，當校工同老師叫佢走時，由於佢情緒太過激動，所以死抱住座位唔放，最後仲用筆袋裡面o既刀割頸自殺而死。而佢當年死唔肯走o既座位，就係中六課室裡面第六行第六個位，而呢個座位之後冇一個學生肯再坐。陳舜就批死小意唔敢坐呢個位，諗住一定可以贏返鋪。
「坐咪坐！有乜咁好驚呀！不過我知你心裡面一定好驚坐呢個位，如果唔係你都唔會認為坐到就好大膽。好心你唔好咁迷信啦！」小意口裡雖然話唔驚，但心裡就越諗越驚，但係為o左呢次大獲全勝o既難得機會，唯有拍心口夾硬頂上。一入到課室，小意就即刻走到「魔鬼學位」坐低，然後向陳舜展示出燦爛o既笑容。「我又贏o左你啦！」陳舜見佢真係坐低，就嬲到出唔到聲。
上堂鐘聲響起，班主任Miss Lam見到小意竟然坐o係幾年o黎一直冇人敢坐o既「魔鬼學位」，呢個位上面坐o左人，總係覺得唔順眼。Miss Lam第一時間就叫小意換位，不過好勝o既小意點都唔肯Miss Lam亦冇理由唔俾佢坐，所以呢個「魔鬼學位」就成為小意今個學年o既座位。
一個禮拜之後，陳舜見小意一o的事都冇，只好對應之前o既承諾，到小意座位前認輸，「你好o野！輸俾你囉！你真係大膽！」點知小意只係呆滯咁抬起頭望一望佢，然後又係咁讀書。「車！扮勤力！」
自此之後，小意就好似變o左第二個人咁，每日淨係對住本書，唔單止唔再同陳舜鬥氣，仲連一向最掂o既運動都唔再參加。睇住小意o的成績同精神越o黎越差，就連陳舜都覺得佢有問題。
卒之有一個朝早，陳舜一返到學校就聽到一陣陣尖叫聲，行到課室先知尖叫聲原來發自小意。小意企o向座位上面好痛苦咁大嗌，「點解唔俾我返學？我要讀書！冇人可以唔俾我返學！邊個唔俾我返學我就死俾佢睇！」跟住就拎把界刀出o黎追住o的同學同自殺。
陳舜見小意好似發神經咁，於是走埋去抱實佢，「邊個唔俾你返學呀？你發咩神經呀？」而同一時間有三位老師趕到，大家一齊制服小意。雖然被綁住，但係小意仍然不斷大嗌「我要讀書！冇人可以唔俾我返學！」終於小意被警察送往精神科看管。由於神父覺得小意並非一般神經失常，所以經常去探佢。
據神父講，小意係因為被邪靈騷擾，所以先會發生失控事件。不過大家都覺得小意自從坐o向「魔鬼學位」之後，應該俾之前自殺o個位學姐上身，卒之搞到「案件重演」。
一個月後，小意由神父陪同下返到學校上課，而本來佢坐開o既「魔鬼學位」亦已經消失，因為學校決定永遠關閉呢個課室，中六班改為浮動班。至於小意就完全正常晒，之不過就改唔同陳舜鬥氣o既習慣，因為陳舜救過佢一命。
[
本帖最後由 MichaelKan 於 21/6/2006 11:22 編輯
]
歡迎光臨 香港寵物小精靈村落 論壇 (https://proxy.archiver.hkpnve.pokebeacon.com/)
Powered by Discuz! X3.2